Kinsa man gyuy mayoriya?

CEBU, Philippines - Masaligon si Cebu City Mayor Tomas Osmeña nga mopabor sa Bando Osmeña Pundok Kauswagan (BOPK) ang desisyon nga ipagawas unya sa Department of Interior and Local Government (DILG)-7 bahin sa kung kinsa ang simple majority sa konseho.

Ang mayor miingon nga bisan ang mga tinun-an sa elementarya nasayod kun asa ang mas labaw sa walo o sa siyam.

Kini human nagkasabot ang BOPK ug ang Barug Team Rama nga modangop sa nahisgutang ahensiya aron pagkuha sa ilahang opinyon aron maresolbar ang isyu kun asa nga partido ang nakakuha sa simple majority sa Konseho.

Una niini si majority floor leader Konsehal Margarita Osmeña ug Minority floor leader Konsehal James Anthony Cuenco miingon ang BOPK ug Barug Team Rama dili mahusay sa maong issue gumikan pulos sila dunay legal basis.

Ang duha ka habig pulos mipresentar og nagkalain-laing Supreme Court decisions aron suportahan ang ilahang argumento.

Buot unta sa konseho nga i-reorganize ang chairmanship sa nagkalain-laing komitiba apan ang oposisyon miingon dili mahimong ipadayon ang reorganization hangtod dili mahatagan og katin-awan kung kinsay simple majority. Ang BOPK dunay siyam ka miyembro samtang ang Barug Team Rama dunay walo sa Konseho,  apan si Vice Mayor Edgardo Labella nga sakop sa paksyon ni Rama miinsister nga angay siyang iapil tungod kay sakop man sab siya sa City Council.

Nunot niini, bisan pa man og nagkauyon ang duha ka habig, apan si Osmeña miingon nga ipadayon niya ang pagpasaka og kasong abuse of authority batok kang Vice Mayor Edgardo Labella.

“He said he is following the law I’ll prove he did not follow the law. You know these people man gud because they are lawyers they’re always right. You Mr. Osmeña you are not a lawyer now I’ll show you, because you are a lawyer 8 becomes bigger than 9,” asoy pa sa mayor.

Sigon ni Osmeña giingon buot sa mga Konsehal sa Team Rama nga i-paralisar ang paghatag og batakang serbisyo sa katawhan. (BANAT NEWS)