Ikatulo sa kinadaghana’g dengue
CEBU, Philippines - Ikatulo sa kinadaghanang namatay sa sakit nga dengue ang Dakbayan sa Talisay ug ika-unom sa listahan sa adunay daghang nasakit og dengue sa tibuok lalawigan sa Sugbo.
Si Dr. Lino Alanzado, pangulo sa City Health Office nagkanayon nga unom na ang namatay sa siyudad.Ang pinakauwahing namatay mao ang usa ka 8-anyos nga batang babaye nga taga Barangay Cansojong niadtong Hulyo 6 sa pribadong tambalanan.
Si Alanzado nitug-an nga gikan sa Enero hangtud sa buwan sa Hulyo nakatala og 219 ka tawo nga nataptan niini.Taas kini kon itandi sa miaging tuig nga 176 ka kaso samtang upat lang ang namatay sa parehong mga buwan.
Gipasabot hinuon ni Alanzado nga dili lang Talisay ang nisaka ang kaso sa dengue sa tibuok nasud apan giangkon niyang naalarma gyud sila kay naglihok man ang ilang Anti-Dengue Task Force.
Matud pa ni Alanzado nga lisod para nila nga sila lang ang molihok batok sa dengue tungod kay kinahanglang moabag usab ang mga barangay opisyal ug labaw sa tanan ang katawhan nga namuyo sa lugar. (BANAT NEWS)
- Latest
