Kapin sa 67,300 ka senior citizen makadawat og hinabang
CEBU, Philippines - Ang kapin sa 67,300 ka senior citizens sa dakbayan sa Sugbo gikatakdang makadawat sa ilang pinansiyal nga hinabang nga tag P2,000 karong adlawa.
Ang maong hinabang sa buwan kini sa Hunyo ug Hulyo niining tuiga ug anha sa ilang tagsa-tagsa ka barangay ipanghatag.
Kini matud pa sa pangulo sa Office of the Senior Citizen’s Affairs (OSCA) nga si Domingo Q, Chaves.
Matud ni Chaves nga niining tuiga aduna silay P807.6 milyones annual financial assistance nga gigahin alang sa beneficiaries. Ang mga beneficiaries nga dili dayon makakuha sa ilang hinabang duna kini napulo ka adlaw nga lugway sugod karong adlawa.
Apan kadtong dili makakuha karong adlawa adto sila mo-claim sa Plaza Sugbo diin ang mga distribution officer magbutang og tent sa maong lugar sulod sa duha ka adlaw.
Ug kung dili pa gyud makakuha ang beneficiary adto na nila makuha ang ilang hinabang sa Cebu City Treasurer’s Office.
Dugang ni Chaves nga kadtong mga masakiton na nga beneficiary nga dili na makahimo sa paglakaw ihatud sa distribution officer sa ilang mga balay ang hinabang. Janine A. Ramil (BANAT NEWS)
- Latest