Duha ka konsehal gidakop

CEBU, Philippines - Nasikop ang duha ka mga konsehal sa lungsod ug barangay kapitan sa San Fernando tungod sa paghupot og mga armas ug ilegal nga drugas human gipatuman ang search warrant diha  sa ilang mga balay diha sa San Fernando Probinsya sa Sugbo kagahapon.

Usa sa mga nadakpan mao ang barangay chairman sa Barangay Magsico, San Fernando, Cebu nga mao usab ang presidente sa Association of Barangay Council sa lungsod nga si Johnny S. Arrisgado.

Apil sa gidakop ang laing duha ka konsehal sa lungsod nga silang Edwin Quijano Villaver, 46, taga Barangay Greenhills ug si  Konsehal Alfonso Donaire, 46, taga Barangay North Poblacion. Ang maong search warrant pinirmahan ni Judge Jerry Dicdican sa RTC Branch 24 sa Dakbayan sa Danao.

Si Police Regional Office 7 Regional Director Chief Supt. Noli G. Taliño mibutyag nga niadtong miaging buwan pa sila nakadawat og mga taho nga nalambigit ang maong mga opisyal sa ilegal nga drugas ug aduna silay mga di lisensyadong armas.

 “Informations coming from the community na sila ay involved sa illegal drugs and unlicensed fire arms. Ang nakakarating (reports),  sila ay protector. Pag allegedly may nahuhuli daw na drug personalities dyan sa kanilang lugar, sila yung minsan nakikipag-usap. Nagiging middle man. Sort of inaarbor nila ‘yung kaso,” si Taliño miingon.

Nakuhaan si Arrisgado og mga armas sama sa kalibre .45, kalibre .45 nga magazine, duha ka mga bala niini, usa ka defective 30 calibre rifle, usa ka frame niini ug usa ka empty shell sa maong kalibre.

Si Villaver nakuhaan og usa ka medium nga pakete sa gituohang shabu, usa ka Black Widow .9mm, duha ka kalibre 45, usa ka .9mm, duha ka magazines, lima ka mga bala sa kalibre .45, 38 ka bala sa .9mm, upat ka bala sa kalibre .357 ug usa ka holster niini. Gikan kang Donaire nakuha ang usa ka medium nga pakete sa gidudahang shabu ug ang usa ka kalilbre .45.

Butyag sa maong direktor nga usa sa ilang mga subayonon kung aduna bay koneksyon ang maong mga dinakpan sa drug lord nga si Franz Sabalones kinsa naila nga nag-operate sa maong lungsod.

“Well pinapakita dito na involved sila sa illegal drugs. Itong mga ‘to ay considered na mga narco politicians,” matud pa ni Taliño.

Apan kining tanan gilimod sa mga dinakpan ug matud pa ni Donaire kinsa nakuhaan og pakete sa shabu  nga siya ang tsirman sa committee sa public order and safety  ug gisuportahan nila ang kampanya batok sa ilegal nga druga ni Presidente Rodrigo Duterte.

Matud pa niya dili mahimo nga iya kadtong nakuhang druga nga gipasangil kaniya sa kapolisan.

“Pwedeng cover up yan. Yan ‘yung pinapakita nila pero ito ‘yung katotohanan. Parang ganun. Fraud lang ‘yun, anyone can do that. Ironically ‘yan ang nakakalungkot dun, kung sino pa ‘yung dapat na magprotekta at sumama sa campaign natin against illegal drugs ay sila pa ‘yung na-involved sa illegal na gawain,”ang tubag ni Taliño sa maong paglimod sa maong mga opisyales.

Si Taliño midugang nga ang sunod-sunod nga pagkasikop sa mga opisyales nagpakita lang nga tinuod ang una nang gibutyag sa presidente nga daghan ang mga incumbent officials nga nalambigit sa druga ug uban pang ilegal nga binuhatan. (BANAT NEWS)