Mga bata nga trabahante naluwas

CEBU, Philippines - Giluwas sa Department of Labor and Employment ang upat ka bata nga gipatrabaho ug gipapauli sa ilang tagsa-tagsa ka lugar.

Ang mga batan-on nag-edad og 16 ngadto sa 17-anyos kinsa gipatrabaho sa construction site sa usa ka warehouse project sa Labogon, Mandaue City samtang ang laing duha nagtrabaho sa usa ka Japan-based trade center sa Barangay Cabancalan sa maong siyudad.

Matud ni DOLE-7 Director Elias Cayanong nga nasuta nga ang mga menor de edad ubos ang sweldo, walay bayad ang ilang night shift differential, overtime premium, special holiday premium, regular holiday pay ug 13th month pay.

Si Cayanong ni-coordinate ni Director Exequiel R. Sarcauga sa DOLE-Negros Island Region aron sa pag-uli sa duha ka menor de edad nga nagpuyo sa Negros Oriental ug ang usa gipapauli sa Leyte ug ang usa sa Asturias, Cebu.

Ang mga batan-on nakadawat og P10,000 ngadto sa P26,000 isip monetary claims ug ang ilang mga employers maoy niabaga sa transportasyon nila. (BANAT NEWS)