SRP butangan og Call Center City

CEBU, Philippines - Nagtinguha karon si Mayor Tomas Osmeña nga makatabang sa mga call center agent pinaagi sa pagtukod og Call Center City sa South Road Properties (SRP).

Ang Cebu City wala na masulod sa top 10 Global Destinations alang sa Outsourcing subay sa gipagawas nga report sa Tholons Services Globalization Index 2017 nga usa ka strategic consulting and investment advisory firm nga nakabase sa London. Sulod sa tulo ka tuig anaa kini sa top 10 ug anaa kanunay sa ika-8 nga pwesto apan niining tuiga, nalandig na kini sa ika-12 nga dapit.

Gipasabot ni Mayor Osmeña nga ang Tholons adunay gidugang nga variable ug kini mao ang digitalization.

Gipangitaan na kini og solusyon sa siyudad ug ang mayor nanghinaot nga makatabang ang Department of Information and Communication Technology.

Dugang niya nga gikinahanglan sab ang kooperasyon sa gobiyerno dungan sa pagbutyag nga si Presidente Rodrigo Duterte angay motudlo og flagship project chairman aron masiguro nga mahatagan kini og aksyon ilabi na nga dili lang ang Sugbo maoy nikunhod apan lakip na ang ubang lugar sa Pilipinas.

Alang sa mayor, dili major problem ang pag-ubos sa ranking sa Cebu City kay matod pa ang dakong problema mao ang kakuwang sa tawo nga dili makatupong sa demand sa call center companies.

Giingong sa wala pa gipagawas ang report sa Tholons, ang siyudad nangita na og solusyon niini pinaagi sa pakigtagbo sa Business Process Outsourcing (BPO) companies.

Aron makatabang sa maong suliran, nagplano si Osmeña nga magtukod og Call Center City sa SRP diin ibutang kini sa Pond A ug gihulagway niya kini nga usa ka major program sa siyudad.

Nasuta nga ang call center companies nagpahigayon og profile aron mahibaw-an kon unsay mga gikinahanglan sa mga agents.

Matawag nga dili ordinaryo ang maong Call Center City kay ibutang man sab ang mga gikinahanglan sa mga ahente diin gawas sa trabaho, kadtong interesado nga mokuha og master’s degree mahimo ra ug kon gusto og duol nga kapuy-an anaa usab.

Gawas nga dili na hasol, luwas ang mga agent  ug dili na sab sila magproblema sa kahuot sa dagan sa trapiko.

Aduna nay investor nga nipadayag og interes sa maong programa ug gipaabot nga buhaton kini sa mayor sulod sa iyang termino. (BANAT NEWS)