German, laing 2 patay sulod sa panimalay

CEBU, Philippines – Patay na nga napalgan ang usa ka German nga nagbuy-od sulod sa iyang giabangang lawak sa Tabunok, Dakbayan sa Talisay kagahapon sa kadlawon.

Si Senior Insp. Albert Quilotorio, deputy chief sa Talisay City Police Station, nagkanayon nga nakit-an sa tag-iya sa apartment ang lawas ni Rolf Peter Stein, 73, nga nagbuy-od na hinungdan nga nitawag sila sa kapolisan.

Sa pagsusi sa mga awtoridad, wala sila’y nakitang foul play sa kamatayon sa langyaw.

Apan si Quilotorio nirekomendar nga ipaubos sa autopsy ang patay’ng lawas aron maklaro ang hinungdan sa kamatayon.

Giingong gibiyaan na sa asawa ang langyaw nga nag-inusara sa dugay na nga katuigan samtang dunay gipamati nga diabetes ug nagdumili sa pagpatambal.

Samtang duha ka patay’ng lawas sab nga nadiskubrehan sulod sa ilang panimaye ang gialarma sa homicide section sa Lapu-Lapu City Police Office (LLCPO).

Si Senior Police Officer 1 Lydo Pinos ang unang nakatubag og alarma sa nadiskubrehan nga patay’ng lawas sa usa ka construction worker sa Barangay Pusok nga giila nga si Ely Maglasang, 63, nga lumad nga taga Asturias.

Laing patay’ng lawas nga napalgan sulod sa ilang panimalay sa Pacific Grand Villa sa Barangay Basak giila nga si Emmanuel Honorario Jacinto, 72-anyos.

Napalgan kini sa iyang sakop sa pamilya alas 7 pasado sa niaging gabii. -/GMR (BANAT NEWS)