Budget sa BRT mas nidako

CEBU, Philippines – Niabot na sa P16.9 bilyones ang pundo alang sa phase 1 sa Bus Rapid Transit (BRT) Project gikan sa unang pundo niini nga P10.9 bilyones.

Gipahibawo ni Cebu City Administrator Engr. Nigel Paul Villarete, kinsa usa sa gitahasan ni Mayor Tomas Osmeña sa BRT Project kalabot sa road right of way (RROW) acquisition, nga ang siyudad nakadawat na og initial fund gikan sa Department of Transportation.

Nasayran nga ang nahisgutang pundo, moabot sa P900 milyones ug gipaabot nga dugang pundo ang itagana, kon dili karong tuiga, sa sunod tuig na.

Ang sunod nga buhaton mao ang pag-umol og RROW acquisition committee.

Gipasabot ni Villarete nga adunay dugang gastohan sa RROW acquisition gumikan sa pagpasar sa R.A 10752 kon pag-facilitate sa acquisition sa RROW site or location alang sa National Government Infrastructure project.

Giingong ang cost of adjustment niini magkinahanglan og pagtugot sa National Economic and Development Authority ICC technical board ug matod pa, giaprubahan na kini mao nga nisaka ang pundo sa maong proyekto.

Giklaro ni Villarete nga ang maong balaod dili lang alang sa BRT Project apan iimplementar usab kini sa tanang proyekto sa gobiyerno nga nagkinahanglan og RROW acquisition. -/DILT (FREEMAN)