Talisay City Jail nangayo’g dugang pwersa
CEBU, Philippines – Nunot sa nahitabong pagpangrakrak sa buhatan sa Talisay City Jail niadtong Lunes sa kadlawon, nipadala og suwat ang warden niini ngadto sa ilang labaw aron sila kahatagan og dugang pwersa.
Nanghinaot si JSupt. Gil Inopia, ang warden sa Talisay City Jail nga unta dunggon sa ilang ulohang buhatan ang iyang hangyo nga madungagan siya og sakop aron makatabang paghatag og seguridad sa ilang buhatan.
Una nang nipadayag si Inopia nga ang maong pagpamusil sa ilang buhatan, binuhatan sa mga tawo nga nasuko kanila gumikan sa ilang istriktong pagpatuman batok sa mga kontrabando nga buot isulod sa ilang pasilidad.
Nasayran nga duha ka tawo ang nakuhaan sa ilang CCTV camera nga nihimo sa maong pagpangrakrak, apan dili kaayo maklaro ang ilang mga dagway kay ngitngit ang kuha niini.
Giklaro ni Inopia nga gibuhat lang nila ang ilang trabaho ug wala sila namersonal. Gani wala nakapahadlok kaniya ang maong hitabo ug nakapaikag nila kini nga ipadayon ang ilang palisiya sa Talisay City Jail.
Dugang niini nga kanunay silang mohimo og greyhound operation sa mga cottages nga ilang gidudahang adunay mga kontrabando nga nakasulod. -/DILT (FREEMAN)
- Latest