Adunay mga kadudahang tawo sa Talisay?

CEBU, Philippines – Mosusi ang pangulo sa Muslim community sa Dakbayan sa Talisay nunot sa taho nga nadawat nga giingong aduna’y mga kadudahang tawo nga gihulagway’ng Muslim ang nasigpatan sa nagkalain-laing barangay sa maong siyudad.

Matud ni Hadji Malik Rasul, presidente sa Muslim community sa Talisay nga wala sila nakadawat sa maong taho apan siya nipasalig nga iya kining susihon.

Iyang gibutyag nga aduna sila’y miyembro sa maong dakbayan nga moabot og 500 diin kasagaran kanila mga negosyante sa Brgy. Tabunok.

Dugang ni Rasul nga niabot na sila og 20 ka tuig nga nagpuyo sa Talisay diin nagsunod-sunod ang iyang mga miyembro.

Sa pasiuna niyang pagkuha og impormasyon, iyang giklaro nga walay mga Muslim nga naabot sa Talisay nga gikan sa Marawi City.

Gipasalig niini ang ilang simpatiya sa kapolisan kay dili sila gusto og samok sa ilang pagpuyo.

Una niini, si Kapitan Raul Cabañero, presidente sa Association of Barangay Council nipabuhagay nga aduna silay nabantayan nga kadudahang tawo. Wala hinoon siya niingon nga kini mga dautan, apan tambag niya nga magpakita sila sa barangay hall aron klarohon ang ilang tuyo sa lugar.

Si PSInsp. Albert Quilotorio, deputy chief sa Talisay City Police Station niingon nga wala sila nakadungog sa maong report apan ila kining susihon.

Nunot sa mga panghitabo, nihimo sila og inbentaryo sa ilang kagamitan ug camp defense plan.

Gibutyag ni Quilotorio nga ang tanan nilang sakop nga moabot sa 72, adunay mga mugbong matang sa armas samtang tag-as ug mugbo ang gihuptan sa mga sakop sa Mobile Patrol ug Special Weapons and Tactics. Giingong pulos kini mobuto ug magamit gyud sa mga dautang tawo nga mohagit kanila.

Ila usab ipatuman ang ilang camp defense plan aron maprotektahan ang ilang buhatan sa mga tawong posibleng mohagit sa ilang katakus.

Dili makatugot si Quilotorio nga mahitabo kanila ang pagpangataki sa mga sakop sa New People’s Army didto sa Maasin ug Iloilo. -/DILT (FREEMAN)