12 ka pushers apil ‘buktot’ dakpan atol sa buy-bust
CEBU, Philippines – Nadakpan sa kapolisan ang 12 ka gidudahang drug pusher, nga naglakip sa duha ka menor de edad, atol sa managlahi nga anti-drugs operation nga ilang gipahigayon sa lainlaing dapit sa Sugbo sukad kaniadtong Martes sa gabii.
Ang 17-anyos nga lalaki nadakpan didto sa Sitio Puntod, Mambaling, dakbayan sa Sugbo, ug ang usa didto usab masikop sa Barangay Ilihan, lungsod sa Tabogon. Ang batan-ong pusher sa Mambaling nakuhaan og 31 ka pakete, matud ni PO3 Jesie Tanola.
Si PO3 Tanola miingon nga ang mga drug syndicate karon migamit na og mga batan-on tungod kay ubos sa balaod dili pa sila mapasakaan og kaso. Didto sa Tabogon, nadakpan usab sa kapolisan nga namaligya og drugas ang 21-anyos nga si Jone Mark Sombal Tul-id ug ang iyang kauban nga 17-anyos nga giila lang nga si Buktot.
Nakuha gikan sa duha ang bali’g P4 mil nga shabu lakip na ang motor nga ilang gisakyan. Samtang, nadakpan usab sa laing buy-bust operation sa dakbayan sa Lapu-Lapu ug Danao ang siyam ka gikatahapang pusher, nga naglakip sa usa ka babaye. Nasakmitan sila og mga P300 mil nga shabu.
Si Senior Inspector Felix Crescencio Cleopas III, hepe sa Presinto 3 sa Lapu-Lapu City Police Office (LLCPO) miila sa mga nadakpan nga mao si Gervine De Guia Etilo, 33, ug Cindy Perolino Cosep, 37, taga Lapu-Lapu.
Matud ni Cleopas nga si Etilo gyud ang ilang tumong nga dakpon apan si Cosep giapil nila kay mao kini ang midawat sa ilang gibayad. Pagrekisa nila sa duha ka dinakpan, dugang 11 ka gagmay’ng pakete sa shabu ang nasakmit.
Sa Barangay Gun-ob, dakbayan sa Lapu-Lapu, nadakpan usab sila si Edelino Casio Jr. alyas Popot, 32, Louven Navela, ug Clent Cosep. Nasakmitan nila ang upat og upat ka gagmay nga paketeng shabu.
Laing buy-bust operation nga gihimo sa Barangay Maslog, Danao ug misangpot sa pagkasikop ni Ceasar Pasaol nga taga Barangay Guinacot ug ang iyang kauban nga babaye nga si Liezel Olivar. Nakuhaan sila og 10 ka gagmay’ng paketeng shabu, tulo ka medium-size nga plastik nga gibana-banang mokantidad og P180 mil. -/RUB (FREEMAN)
- Latest