Langyaw gidakop kay nanglugos og dalaga sa beach resort
CEBU, Philippines – Gidakop sa mga polis didto sa lungsod sa Santa Fe, isla sa Bantayan ang usa ka langyaw nga gikan sa Estonia, Europe kay gireklamo kini nga nanglugos og 18-anyos nga dalagang taga dakbayan sa Mandaue.
Ang suspek nga si Xander Tann, 29, nga gibilanggo karon sa Santa Fe Police Station giandaman og kaso nga paglapas sa Expanded Anti-Trafficking in Person Act nga ipasaka sa hukmanan. Gitumbok si Tann nga milugos sa biktima nga temporaryong nagpuyo sa Madridejos.
Base sa imbestigasyon ni SPO2 Sheila Illustrisimo, pangulo sa Womens and Children’s Protection Desk sa Santa Fe Police Station, nagkaila ang biktima ug ang suspek sa usa ka ‘dating site’ sa Sugbo ug wala pa sila magkita sa personal.
Matud pa nga kaniadtong Hunyo 13 ang biktima miadto sa Madridejos, usa sa mga lungsod sa Bantayan, para moeskwela aron dili na siya samokon sa maong langyaw nga temporaryo nga nagpuyo sa Dakbayan sa Lapu-Lapu.
Gibutyag ni SPO2 Illustrisimo nga niadtong Hunyo 24 niabot sa Santa Fe ang langyaw ug nipadala kini og video sa maong biktima hinungdan nga sila nagkakita, apan wala siya mag-inusara atol sa maong higayon.
Ang biktima nakaadto na usab sa giestahan sa langyaw apan duna siya’y kauban nga iyang ig-agaw. Matud pa nga kagahapon sa kaadlawon ang langyaw miadto sa gipuy-an sa biktima ug nakig-inom. Kay kaadlawon na, ang ig-agaw sa biktima gusto na nga matulog.
Matud pa nga kay gusto pa nga moinom ang langyaw, gikuyogan kini sa biktima nga mopalit og ilimnon, apan kay sirado ang mga tindahan niabot sila sa Bantayan. Dihang nakapalit na sila, didto na siya gidala sa langyaw sa iyang gipuy-an.
Ang dalaga gusto unta nga moikyas apan nagunitan siya sa langyaw ug gisapwang paingon sa kuwarto niini ug didto giamong-amongan. Gisaysay sa biktima ngadto sa imbestigador nga kaduha siya gi-rape sa langyaw. Matud sa dalaga nga nanguyab kaniya ang langyaw apan wala niya kini sugta.
Si Hedda Largo, ang chief executive assistant sa opisina ni Bise Gobernador Agnes Magpale nibutyag nga kahibalo na ang kapolisan sa kalungsuran sa ilang pagabuhaton sa mga biktima sa pagpangabuso batok sa kababayen-an, ilabi na kon ang suspek usa ka langyaw. -/RUB (FREEMAN)
- Latest