2 ka tawo nilungkab sa pawnshop sa Danao

CEBU, Philippines - Kasamtangang gisusi sa mga imbestigador sa Danao City Police Station ang nakuhang footage sa Close Circuit Television (CCTV) camera sa pension house nga giabangan sa duha ka tawo nga gidudahang maoy naglungkab sa usa ka pawnshop nga nahimutang sa may dalan Rizal sa Barangay Poblacion sa Dakbayan sa Danao. Gisunod sa Banat News ang kalambuan sa nahitabong pagpanglungkab sa Montaño Pawnshop diin matud ni SPO1 Arnold Labine nga usa sa duha ka lalaki nga niabang og lawak sa pension house, nagpaila sa ngalan nga Marvin Tawanga.

Iyang gibutyag nga ang pension house nga gipuy-an sa duha, nahimutang tapad ra sa pawnshop diin gituohan nga nigamit sila og electric drill aron buslotan ang bongbong nga nilapos paingon sa pawnshop.

Matud ni SPO1 Labine nga dihang nakasulod ang mga kawatan, lakip nilang gilungkab ang vault nga gisudlan sa nagkadaiyang mahalon nga mga alahas nga nagkantidad og P2.2 milyones ug salapi nga P200 mil.

Lakip nilang gidagit ang nagkadaiyang relo de pulso nga gi-display sa estante nga bildo diin nagkantidad ang tanan og P50 mil.

Gibutyag sa polis nga unang higayon kini nga adunay nahitabong pagpanglungkab sa Danao. Daku ang ilang pagtuo nga ang maong mga kawatan, gikan sa laing lugar. (BANAT NEWS)