Allowance sa mga tanod ug loader gibalik na

CEBU, Philippines - Gibalik na ni Cebu City Mayor Tomas Osmeña ang paghatag og allowance sa mga barangay tanod ug loader human sila napaubos sa drug test.

Niadtong buwan sa Pebrero niining tuiga nipagawas og kamanduan si Mayor Osmeña nga hunongon niya ang paghatag og allowance sa mga tanod ug loader. Usa sa iyang kondisyon nga mabalik ang ilang allowance mao nga kinahanglan ipaubos sila sa drug test diin kadtong mga nagpositibo gitaktak sa trabaho.

Kay nahuman na man sa pagpaubos sa surprise drug test ang mga tanod ug loader gikan sa 80 ka barangay sa dakbayan, gibalik na sa mayor ang ilang allowance.

Apan giangkon sa mayor nga dunay problema nga nasugatan kay dili magkatakdo ang lista sa mga barangay sa lista sa siyudad.

Gibasol ni Osmeña si Association of Barangay Council (ABC) President ug Tisa Barangay Kapitan Philip Zafra kay matud pa dihang si Konsehal Margarita Osmeña niduol kang Zafra aron unta han-ayon ang lista giingong gipulitika kini sa Team Rama.

Si Zafra sa iyang bahin nipasabot nga aduna gyuy kalahian sa ilang mga listahan kay adunay uban nga mag-ilis sa listahan kay adunay mga empleyado nga mo-resign tungod sa kagamay matud pa sa sweldo.

Nagkanayon usab kini nga sulod sa dul-an lima ka buwan nga wala makadawat og allowance ang mga tanod ug loaders, hingpit na kining gibalik human sa pagpaubos nila og drug test nga maoy gihimong basehanan. Nanghinaot si Zafra nga magpadayon ang maong kalambuan.

Nasayran nga sa niaging mga buwan ang mga barangay gipasumetir og master list ug gipasukip ang resulta sa drug test.

Dugang ni Zafra nga naandam ra usab dayon ang payroll sanglit usa man siya sa mga mopirma niini.

Nasayran nga ang mga tanod ug loaders magdawatan og P4 mil nga allowance gikan sa kagamhanan sa Siyudad sa Sugbo. (BANAT NEWS)