Kabomberohan ipa-drug test

CEBU, Philippines - Subling gipasidan-an sa pangulo sa kabomberohan sa rehiyon ang iyang mga sakop ilabi na kadtong mga nalambigit sa ilegal nga drugas ug naghupot og armas nga dili lisensiyado nga dili apilon ang ilang mga kauban nga nagtinarong sa ilang serbisyo.

Si Bureau of Fire Protection-7 Regional Director FSSupt. Samuel Tadeo nipasidaan sa tanan niyang ginsakopan ilabi na kadtong mga nalambigit sa ilegal nga mas maayong moundang na lang sila sa serbisyo aron dili makaduhig sa mga nagtinarong sa ilang trabaho.

Matud ni Tadeo, dili siya motabon sa iyang mga sakop nga nalambigit sa ilegal nga kalihukan kay kinahanglan silang manubag sa ilang nahimong sala.

Ang maong pamahayag giluwatan ni Tadeo subay sa nahitabo niadtong adlaw’ng Lunes diin ang hapit nang moretiro nga si SFO1 Roel Deiparine kinsa sakop sa Danao City Fire Station, nakuhaan og mga paltik nga armas.

Si Deiparine gitumbok sa Criminal Investigation and Detection Group nga usa sa mga sakop sa gang nga nagpadagan og mga paltik nga armas sa siyudad.

Sumala ni Tadeo, wala siyay nadawat nga reklamo bahin kang Deiparine kabahin sa gikalambigitan niini nga ilegal hinungdan nga nakurat siya sa pagkasikop niini.

Nunot sa maong hitabo, posibleng mohimo og surprise drug test ang buhatan ni Tadeo ngadto sa iyang mga sakop aron masuta kon wala bay nalambigit kanila sa paggamit sa ilegal nga drugas.

Kahinumduman nga niadtong buwan sa Pebrero nipahigayon og drug test ang BFP-7 diin adunay nagpositibo. Ang maong resulta giduso ngadto sa ilang ulohan nga buhatan diin ang mapamatud-an, posibleng mataktak sa serbisyo. (BANAT NEWS)