Gibiyaan sa asawa nanghasi

CEBU, Philippines - Gidakop ang usa ka lalaki nga armado samtang nakuhaan sab kini og drugas sa Sitio Rooseville, Barangay Lawaan 1, Dakbayan sa Talisay niadtong Lunes sa buntag.

Gialarma si Louie Bayugan alyas Taloy, 27-anyos, tungod kay nanghasi kini nga armado.

Sa dihang girespondehan sa kapolisan, didto ilang nakit-an ang suspek ug gipakalma. Nisumiter ra hinuon ang suspek sa iyang kaugalingon ug nibuhi sa iyang .38 revolver nga adunay upat ka bala.

Sa dihang girekisa, nakuhaan siya og usa ka medium nga pakete sa shabu nga motimbang og 6.20 gramos nga adunay kantidad nga P73,160 mil. Asoy ni Bayugan nga nabuhat niya ang pagpanghasi tungod sa iyang kasuko nga gibiyaan siya sa iyang asawa.

Gidala siya sa Talisay City Police Station ug gikatakdang pasakaan og kaso. (BANAT NEWS)