Pekeng bugas sa Lapu-Lapu?

CEBU, Philippines - Residente sa Barangay Basak Lapu-Lapu City ang nireklamo human giingong nakapalit og peke nga bugas sa merkado.

Ang nipadangat sa iyang reklamo mao si Delia Alegado. Matud pa ni Alegado, nagluto siya og arrozcaldo tungod kay ilang saw-an sa iyang pamilya, tungod kay natulog pa iyang mga anak iyaha usa kining gisulod sa refrigerator aron dili mapan-os.

Dugang pa ni Alegado sa dihang iyang gisusi didto na niya nasuta nga susama kini og pagkaon nga maja ug sa iyang pag-ukay mura na kini og foam hinungdan nga siya nagtuo nga peke ang bugas nga iyang napalit.

Si Olma Marie Bayno, ang tigpamaba sa National Food Authority 7 nitug-an nagpadala na sila og supervising enforcement and investigation nga si Edgar Diaz sa lugar aron mohimo sa  interview ug pakisusi sa giingong peke nga bugas.

Dugang pa ni Bayno, karon adlawa mopagawas og inisyal nga taho ang ilang team nga gipadala sa maong lugar.

Si Bayno nipahibalo usab nga sunod semana masayran na usab ang resulta sa giingong peke nga bugas sa lungsod sa Sta. Fe nga una nang gihimakak sa NFA-7 nga nagbaligya sila og fake rice samtang si Bise Gob. Agnes Magpale misalikway niini kay gisuwayan nila og luto ang sampol sa maong bugas apan dili kini peke. (BANAT NEWS)