Gilapwaan sa asawa

CEBU, Philippines - Usa ka polis nga nadestino sa habagatang bahin sa Probinsya sa Sugbo ang gikatahong gilapwaan og init tubig sa iyang asawa human matud pa nasakpang adunay kadulog nga laing babaye sud sa presinto nga iyang gitrabahoan niadtong Sabado sa kaadlawon.

Matud pa nga pwerteng sukoa sa asawa sa maong polis nga nagranggo og Senior Police Officer nga aduna nay mga apo,  samtang ang babaye nga gikatupad niini og katulog buwag sa bana.

Apan gikatahong wala kini na-blotter sa police station. Lahi usab ang estorya sa desk officer sa maong police station nga si Police Officer 1 Ryan Manguilimotan kinsa mao usab ang duty adtong adlaw nga Sabado sa pagkahitabo.

Matud niya alas-5 sa kaadlawon niabot sa ilang police station ang asawa sa maong polis apan wala siya nakabantay niini kay nataymingan nga atoa siya sa pansayan.

Sumala pa ni Manguilimotan, nidiretso ang asawa sa maong polis sa quarter sa iyang bana ug wala kini kasikas nga nadungog gikan sa quarter. Diha ra siya nakabantay sa dihang padulong na kini mogawas nga niagi sa iyang atubangan.

Gihimakak niya nga nag-eskandalo ang asawa sa maong polis kay kun nahitabo nakadungog unta ang mga tawo sa gawas diin daghan ang naninda.

Gitug-an ni Manguilimotan wala siya masayod kung aduna bay kadulog nga babaye ang maong polis kay wala man siya nakakita.

Iya usab gihimakak nga maong wala maka-duty ang maong polis dili tungod sa pasangil nga gilapwaan kini og init tubig sa bugan samtang natulog kondili aduna kini interview alang sa promosyon niini.

Apan si Police Officer 1 Jonas Gonzales, Desk Officer gihapon sa maong police station nga nahinabi sa Padayon Pilipino Program sa DyRC nitug-an alas -5  sa kaadlawon nasakpan sa ginang ang bana niini nga adunay katupad og katulog. Giingong pag-abot sa balay sa polis didto gibubuan kini og init tubig sa asawa hinungdan nga kini nakaangkon og mga paso.  Wala ma-blotter ang maong panghitabo.

Si Senior Inspector Alfredo Kuhay, hepe sa maong police station nga nakahinabi sa Banat News miingon nga iyang gipatawag ang maong polis bahin sa nahitabo, apan ang maong polis mitug-an nga away lang kadto sa magtiayon.

Gihimakak usab niini nga aduna siyay laing kadulog nga babaye. Apan si Kuhay miingon nga nakadungog siya og tabi-tabi nga gibuboan og init tubig ang iyang polis apan wala man siyay nakita nga paso.

Wala say niduol kaniya nga asawa sa maong polis aron moreklamo, apan siya nipasidaan nga ang imoralidad gidili gyud kanila sa PNP ug dili niya kini palabyon. (BANAT NEWS)