1 nakasibat, 1 napusilan sa buy-bust
CEBU, Philippines - Nasikop ang upat ka lalaki nga nalambigit sa ginadiling drugas samtang usa ang nakasibat sa managlahing operasyon sa kapolisan sa Siyudad sa Talisay niadtong Domingo.
Unang operasyon gihimo sa Sitio Luna, Barangay Lagtang alas 12:10 sa kadlawon apan ang subject nga si Melton Ortega ang nakaipsot.
Hinuon ang kuyog niini nga si Barry Jason Aleman ang nasikop ug nakuhaan og siyam ka gagmay nga pakete sa shabu.
Alas 2:30 sa hapon nasikop ang magsuong Ronald Bacus alyas Dodong, 21, ug Rogelio Bacus Jr., 28, taga Lawaan III.
Si PO3 Stephen Sefuesca nagkanayon nga si Rogelio naapil sa pagkasikop tungod kay didto kini atol sa operasyon kay nangayo og shabu sa iyang igsuon para konsumo.
Nironda sab ang mga awtoridad sa Sitio Tunga, Barangay Tangke alas 9 sa gabii ug nasikop si Zebreb Mabanag, 29-anyos nga ulitawo, kinsa naatlan nga namaligya kilid lang sa karsada sa paagi nga one-stop shop.
Gipasabot ni Sefuesca nga kompleto na ang suspek sa pagbaligya tungod kay dala na ang drug paraphernalia.
Samtang upat sab ka tawo ang nasikop sa mga sakop sa Toledo City Police Station alas 6:15 sa gabii niadtong Domingo sa may Barangay Calong-Calong diin usa niini ang nalandig sa tambalanan human kini napusilan kay nisukol.
Ang nasikop mao ang subject nga si Jomar Villas, 39; Jeramie Pasaylo, 28; Julito Quilay, 39, ug Adonis Repuesto, 26, pulos residente sa maong lugar.
Matud ni Senior Police Officer 2 Gerardo Taboada nga dul-an sa usa ka semana ang pagpahigayon og surveillance kang Villas kinsa naila nga bag-ong nagsugod sa maong negosyo.
Nakuha gikan sa mga dinakpan ang 20 gramos nga shabu nga mobalor og dili mominus sa P220 mil, kagamitan sa pagsuyop, .9mm Ingram pistol, duha ka magazines ug 12 ka bala.
Si Pasaylo sa iyang bahin nitug-an nga iyang kapuyo maoy tigbaligya og drugas ug igo lang siyang mogamit niini. (BANAT NEWS)
- Latest
