Talisay jail girapido

CEBU, Philippines - Girapido sa duha nga wala mailhing mga lalaki ang Talisay City Jail nga nahimutang sa Barangay Maghaway, Dakbayan sa Talisay kagahapon sa alas 12:35 sa kaadlawon.

Hinuon wala’y mga naangol o namatay sa maong insidente gawas lamang sa pagkabuslot sa unang gate sa maong prisohan.

Si Jail Warden Supt. Gil Inopia nibutyag nga ang ilang hugot nga kampanya sa ginadiling drugas maoy gitan-aw niya nga motibo sa maong pagpamusil.

Matud pa niya nga kalit lang naabot ang duha ka mga lalaki dayon paarak og armas tumong sa ilang gate. Gidudahan nga nigamit og KG-9 submachine pistol ang mga gunmen.

Nakita ang mga armado sa ilang CCTV apan nagsuot sila og hoody jacket ug nagsakay og motorsiklo maong dili kaayo maklaro ang ilang mga dagway tungod kay ngitngit man ang dapit.

Samtang ang usa sa CCTV nga mao gyud unta ang nag-atubang sa mga gunmen guba kini kay naigo kaniadto og kilat. Wala say nakakuha sa plaka sa maong motor.

Matud pa ni Inopia nga wala dayun nigawas ang iyang mga sakop human sa pagpamusil tungod kay nitawag pa man sila sa kapulisan sa Talisay aron maoy silbing back-up.

Sila si PO3 Stephen Sefuesca sa Talisay City Police Station nakakuha og 12 ka kabhang sa .9mm nga bala ug usa ka kabhang sa .45 nga bala  diha sa crime scene.

Asoy pa ni Inopia nga ilang ipatan-aw sa mga eksperto ang ilang CCTV kun aduna ba sila’y mahimo niini nga mailhan ang mga nangrapido kanila.

Iyang gibutyag nga dili kalikayan nga aduna’y maglagot kanila tungod  ilang gipahugtan ang ilang buhatan nga makasulod ang mga kontrabando.

Gani halos kada adlaw nag in-house greyhound operation aron masiguro nga wala gyu’y mga kontrabando nga makalusot.

Aduna usab silay kausaban sa pagpasulod og bisita sa priso, gidili na ang bisita nga dili kabanay sa priso.

Diha sa TCJ gibalhog ang high-profile inmate nga si Steve Go kinsa nalambigit sa ginadiling drugas nga planong ibalhin ngadto sa Mandaue City Jail tungod kay atoa man ang iyang kaso sa nahisgutang lugar.

Wala pa silay matumbok nga priso kun kinsay may kalambigitan sa maong pagpangrakrak.

Nagkanayon si Inopia nga ang maong panghitabo dili makapaluya kanila tungod kay nibuhat man lang sila sa ilang trabaho. (BANAT NEWS)