Pag-usab sa master drainage plan, dili madali

CEBU, Philippines – Gitug-an sa pangulo sa City Engineering Office sa Siyudad sa Talisay nga dili sayon ug dili madali ang pag-usab sa master drainage plan nga buot ipa-implementar ni Mayor Eduardo Gullas.

Ang maong plano sa kanal alang sa kinatibuk-an sa Dakbayan sa Talisay diin gihimo kini niadto pang tuig 2010 apan pipila lang ka lugar sa Brgy. Bulacao ug Lawaan 1 naimplementar ang maong master drainage plan.

Matud ni City Engr. Gamaliel Vicente Jr. nga dili sayon ang paghimo sa plano kay lahi na man sab ang analysis karon sa drainage sa siyudad tungod kay dili na man sab mao ang dagan sa tubig kanal ilabi na og gipang-alihan na kini o ba kaha gipangtukuran na og mga panimalay.

Laing rason kon nganong dili mali ang master drainage plan mao nga wala’y igong ekipo nga makahimo sa survey ug uban pa. Gawas lang kon aduna’y mga kagamitan nga hi-tech ang mohimo niini.

Ang nagtrabaho sa plano kaniadto nibana-bana sa gastohan sa lokal nga kagamhanan nga moabot sa P128 milyones sa paghimo sa ilang plano alang sa tibuok siyudad apan posible sab kini nga mausab na kay nimahal na man ang mga materyales.

Kahinumduman nga si Mayor Gullas nagtinguha nga ipatuman ang master drainage plan sa dakbayan kay mao kini ang hinungdan nga dali nga mobaha ang mga lugar sa siyudad matag bunok sa uwan.

Gani gisuspenso sa konseho ang pagdawat og mga aplikante nga motukod og mga subdivision kini aron mahan-ay nilang daan ang ilang drainage system ug dili kay mag-iyahay na lang og himo og kanal nga dili matakdo sa plano sa kagamhanan. -/DILT (BANAT NEWS)