Asong Pinoy Day gisaulog sa Cebu City
CEBU, Philippines – Gipahigayon sa Department of Veterinary Medicine and Fisheries (DVMF) Cebu City ang ilang ika-7 nga Asong Pinoy Day sa Plaza Independencia kagahapon.
Ang maong kalihukan adunay nagkalain-laing panagtigi diin nagpakita sa abilidad sa Philippine Native Dogs nga nihimo og mga nagkadaiyang trick.
Pipila sa mga contest nga gipahigayon naglangkob sa dog-owner paper dance contest, dog food/hotdog bobbing contest ug potato and spoon race contest.
Gawas niini, adunay mga makalingaw nga duwa atol sa maong kalihukan sama sa locate your treat, wheel of paw tune ug pabuto og balloon.
Nagpahigayon usab sila og online ug on-site competition alang sa Asong Pinoy Model Year 2, My Asong Pinoy Rescue Story ug Best Looking Pinoy.
Ang premyo sa matag category mao ang usa ka bag sa dog food, shampoo ug sabon.
Samtang ang DVMF nagtanyag usab og libreng veterinary services sama sa anti-rabies vaccination, deworming ug vitamin supplementation.
Ang kalihukan kagahapon gisugdan sa alas 9 sa buntag ug nahuman alas 4 sa hapon diin gatusan ang nitambong.
Nagkanayon si Dr. Alice Utlang, pangulo sa DVMF nga tumong sa maong kalihukan nga mausab ang huna-huna sa publiko labot sa mga Pinoy nga iro, diin sama sa mga pure-bred dog, aduna usab kini abilidad human nga ma-train sa ilang mga amo.
Gitataw usab niini ang native dogs angayan usab nga tarungon sa pagtratar sama sa pure-bred dogs.
Mapasalamaton si Dr. Utlang kang Mayor Tomas Osmeña tungod kay gisuportahan ang ilang kalihukan diin nagpakita lang kini nga ang siyudad ‘animal-friendly’. -/DILT (BANAT NEWS)
- Latest
