Gihimong pagbansay sa Phl ug US Navy makaayo

CEBU, Philippines – Gitapos na niadtong Biyernes ang lima ka adlaw nga pagbansay-bansay sa mga tropa sa Philippine Navy ug US Navy sa Naval Forces Central nga nahimutang sa Dakbayan sa Lapu-Lapu.

Nagsugod niadtong Hunyo 19 ang Sama-Sama 2017 diin ang duha ka tropa sa mga navy dungan nga gipaubos og training sama sa pag-rescue, pagtubag kon adunay kinahanglan tambalan ingon man seguridad sa maritima.

Niadtong Huwebes nipahigayon sila og simulation exercise bahin sa visit, board, ug seizure (VBSS) nga gihimo sa kadagatan sa Bohol.

Ang maong training nagtudlo kon unsaon pagdakop sa barko nga adunay mga kargang ilegal ug unsaon pagsikop sa mga tawo nga lakip sa maong krimen. Si Rear Admiral Don Gabrielson, Commander Task Force 73 sa US Navy niingon nga fundamental sa duha ka navy ang gisaw-an nilang pagbansay sanglit sa dugay na nga panahon nagkauban ang duha ka tropa sa kadagatan.

Ang maong pagbansay makapausbaw pa sa ilang katakos. "We worked on this exercise on boarding ships, we worked together on rescue to save lives, we work together on basic air defense (and) capabilities, and we work together on diving subject matter exchanges  and other maritime security exchange of information, some cyber information and also on regular relationship-building that needs to happen in order to build and to deepen the trust in the relationship we already have," matud pa ni Gabrielson.

Samtang si Commodore Loumer Bernabe, commander sa Naval Forces Central niingon nga ang maong halos usa ka semana nga kalihukan nakatukod og mas lig-on nga pundasyon o alyansa aron andam nga makatubag sa bisan unsa nga natural o man-made nga katalagman.

"The strong point there is we continue to work together on same goal or objective that is making our region safe and secured as there are a lot of challenges happening," matud ni Bernabe. Dugang niini nga ang maong pagbansay-bansay uban sa US Navy makaayo diin iyang gihimong ehemplo ang nahitabo sa niadtong pag-igo sa bagyong Yolanda niadtong tuig 2013 diin mitabang ang ilang counterparts nga naglakip sa US Navy.

Asoy usab ni Gabrielson nga ang maong pagbansay magamit sa tinuoray nga sitwasyon kay ang duha ka kampo nakasinati og mga pagsuway ilabi na ang disaster-response. -/DILT (BANAT NEWS)