Eid’l Fitr sugaton sa mga Muslim sa Sugbo
EID MUBARAK ... Ang mga Pilipinong Muslim pormal nga mitapos sa ilang 30 ka adlaw nga pagpuasa o Ramadan pinaagi sa gitawag nga Eid’l Fitr dala ang pag-ampo nga matapos na ang pag-antos tungod sa krisis didto sa Marawi City. May Miasco
CEBU, Philippines – Sugaton sa Muslim communities dinhi sa Sugbo ang Eid’l Fitr diha sa Plaza Independencia sa dakbayan sa Sugbo.
Si Cebu City Mayor Tomas Osmeña misaad kanila nga ang kagamhanan sa siyudad magpadayon sa pagtabang kanila.
Ang mayor kinsa maoy Sultan sa mga Muslim dinhi mihatag og mubong mensahe sa mga Muslim nga nagtapok Plaza Independencia alang sa pagtapos sa Ramadan.
Nagpadayon ang pagpanawat og hinabang nga gipasiugdahan sa Cebu City Disaster Risk Reduction Management Office (CCDRMO), Division for the Welfare of the Urban Poor (DWUP) Muslim Affairs Commission alang sa mga residente sa Marawi City nga mibakwit sa Cebu City.
Niadtong Hunyo 16, ang siyudad mihatag og grocery items nga mokabat sa P500 sa dili mominus 50 ka pamilya nga gikan sa Marawi kinsa naa karon nagpasilong sa ilang mga kabanay sa nagkalain-laing barangay sa siyudad.
Gipasalamatan sa mayor ang Muslim Community sa pagtabang nila sa mga tinugyanan sa balaod sa pagmentinar sa kahapsay ug kalinaw sa dakbayan ilabi na karon nga dunay hulga sa terorismo.
Mapasalamaton usab si Sultan Naif Punot sa Muslim Affairs Commission kang Mayor Osmeña sa tabang nga gipasalig ug wala usab makasinati og diskriminasyon sa siyudad. - /EIM (BANAT NEWS)
- Latest
