Minglanilla reclamation ECC na lang ang kuwang

CEBU, Philippines - Gamay na lang gyud ang kuwang aron masugdan na ang gipangandoy nga reclamation project sa Lungsod sa Minglanilla.

Si Mayor Elanito Peña nibutyag nga nakigtagbo na kanila ang kadagkuan sa Department of Environment and Natural Resources (DENR) sa kauluhan alang sa pagkuha og Environmental Compliance Certificate (ECC).

Ang 100 ka ektaryang reclamation project inabagan kini sa pribadong kompaniya nga Ming Mori Development Corporation nga mogasto og P5 bilyones.

Gipanglantawan ni Peña nga daghan ang makatrabaho inig sugod dayon sa proyekto hangtud sa paghuman tungod kay ila kining himuon nga tourist attraction dili lang sa mga lokal apil na ang foreign investors nga gustong mobubo og puhunan.

Matud ni Peña nga ECC na lang gyud ang kuwang aron masugdan na dayon ang proyekto.

Niadtong Hulyo 28 sa niaging tuig gihimo ang public hearing alang sa maong katuyoan tungod kay maigo man ang Barangay Tulay, Tungkil ug Calajoan sa maong proyekto diin gibana-bana nga maapektuhan ang 3,000 ka residente.

Gani dunay kabalaka nga madaut ang kinaiyahan gumikan sa plano nga proyekto apan ang Ming Mori nipasalig nga ilang tubagon ang tanang reklamo aron matigayon na ang dako nga proyekto nga maoy makapalambo sa lungsod. (BANAT NEWS)