Armas, shabu sakmit sa buy-bust

CEBU, Philippines - Mokabat sa P334 mil nga balor sa ginadiling drugas ang nasakmit sa mga sakop sa Toledo City Police Station sa buy-bust operation sa Sitio Luas, Matab-ang.

Nasikop si Jose Mahinay Suarez alyas Ging-ging, 39, kinsa maoy subject sa operasyon, lakip ni Charlie Cañoneo Basiles, 29; Glenn Wagas Arenas, 18, ug Wilfred Carmelotes Acaso, 21, parehong taga Poblacion, Asturias.

Nasakmit gikan kang Suarez ang pito ka medium-size nga putos sa gidudahang shabu ug laing duha ka gagmay nga putos sa shabu nga nitimbang og 30 ka gramos nga balor og P334 mil.

Gawas sa shabu nakuhaan sab si Suarez og usa ka .9mm Ingram nga kalibre sa armas nga adunay 12 ka bala ug usa ka magazine sa .9mm.

Samtang ang laing tulo nakuhaan og usa ka gamay nga putos sa shabu ug mga drug sniffing paraphernalia.

Ang operasyon gipangulohan ni Police Superintendent Anthony Telin Bagarinao kinsa lima ka adlaw pa lang nga nagsilbi isip hepe sa kapolisan sa Toledo.  Samtang balor og P75 mil nga shabu ang nasakmit sa buy-bust operation sa mga sakop sa Philippine Drug Enforcement Agency-7 sulod sa usa ka hotel sa dalan Junquera, Dakbayan sa Sugbo niadtong Huwebes.

Nasikop ang unom ka durugista lakip na ang drug den maintainer nga si Arvin Ybañez, 34-anyos.

Nakuha gikan sa grupo ang lima ka bulto sa gituohang shabu.

Sa Dakbayan sa Lapu-Lapu, nadakpan sa managlahing buy-bust operation ang walo ka gikatahapang pushers nga naglakip sa duha ka babaye.

Si Senior Inspector Joey Bicoy sa City Intelligence Branch ug City Drug Enforcement Unit (CDEU) sa Lapu-Lapu City Police Office (LLCPO) niila sa duha ka babaye nga nadakpan sa Sitio Buyong, Maribago nga sila si Vibyen Berlan Pinote alyas Yenyen, 30, taga Soong I, Mactan ug Joselito Paquibot Bernales, 49, nagpuyo sab sa maong dapit, kinsa nasakmitan og lima ka gagmay nga pakete sa shabu ug duha ka medium-size.

Giila ang laing babaye nga nadakpan sa Sitio Soong 1, ala 1:35 sa niaging kadlawon nga mao si Gracialinda Macapagal Inghog alyas Madam, 48-anyos, kinsa nasakmitan og 16 ka gagmay nga pakete sa shabu nga balor og P7,552.

Sa Sitio Kapilis, Suba Basbas sa mao gihapon nga dakbayan sa alas 4 hapon sa maong adlaw maoy nadakpan sila si Ray Amodia Pogoy, 48, ug Jayson Sullano Diola, 33, kinsa nasakmitan og 13 ka gagmay nga pakete sa shabu.

Sa Sitio Camansi, Pajo sa alas 5 sa hapon nadakpan sila si Mark Kristian Booc, 26; Jhel Hinayas Cimafranca alyas Hapon ug Portugal Balane alyas Galgal, 28-anyos, kinsa nasakmitan og 31 ka gagmay nga pakete sa shabu.

Sa laing bahin, sa joint checkpoint nga gipahigayon sa Bogo City Police Station ug Regional Public Safety Batallion (RPSB) sa Barangay Cogon nadakpan sila si Jayson Morados Dahonan, 23, ug Eya Yap Durohon, 30, taga Kanluhangon, Tabuelan, ug nasakmit ang duha ka gagmay nga pakete sa shabu. Raymond D. Abarcas, Camille L. Pateres ug Romeo T. Limpangog (BANAT NEWS)