P3M sweldo sa cash for work program gihatag

CEBU, Philippines - Emergency cash assistance sa Department of Labor and Employment (DOLE) alang sa rehabilitasyon tungod sa pag-igo sa bagyong Yolanda giapod-apod sa Lungsod sa Tabogon ug Dakbayan sa Bogo sa nilabay nga semana.

 Ang Tabogon ug Bogo nalakip sa mga lungsod nga naigo sa bagyong Yolanda niadtong tuig 2013.

Apan hangtod karon aduna pay daghang mga biktima nga nawad-an og trabaho ang wala pa hangtud karon nakabarog pagbalik.

Ubos sa DOLE Revised Guideline sa pag-implimentar sa Department Integrated Livelihood and Emergency Employment Program kadtong mga nawagtangan og trabaho, biktima sa kalamidad maoy prayoridad sa maong ayuda.

Ang gibanabanang P3 Milyones nga kantidad gisuhol sa 635 ka mga trabahante diin 460 niini gikan sa Tabogon ug 175 gikan sa Dakbayan sa Bogo.

Ang mga trabaho sa mga gibayaran niini naglangkob sa paghakot og balas ug graba, paghabwa sa tubig, pagpanglimpyo, paglimpyo sa mga kanal, pagtanom og kahoy, gardening ug beautifications.

Gitug-an ni Cayanong, tanang lugar sa probinsya sa Sugbo nga naapektahan sa Yolanda makadawat og ayuda gikan sa DOLE. (BANAT NEWS)