Asong Pinoy Day sa Plaza
CEBU, Philippines - Ipahigayon sa Department of Veterinary Medicine and Fisheries sa siyudad sa Sugbo ang ilang ika-7th Asong Pinoy Day karong adlaw’ng Domingo diha sa Plaza Independencia.
Dunay giandam nga nagkalain-laing aktibidad diin makita ang abilidad sa mga Philippine Native Dogs.
Pipila sa mga kalihukan nga mahitabo mao ang dog-owner paper dance contest, dog food o hotdog bobbing contest ug potato ug spoon race contest. Gawas niini, dunay mga duwa sama sa locate your treat, Wheel of Paw Tune ug pagpabuto og balloon.
Nasayran dunay online ug on-site competition alang sa Asong Pinoy Top Model Year 2, My Asong Pinoy Rescue Story ug Best Looking Pinoy.
Ang premyo sa matag kategoriya naglangkob sa usa ka bag sa dog food, shampoo ug sabon.
Ang DVMF manghatag usab og libreng veterinary services sama sa anti-rabies vaccination, de-worming, ug vitamin supplements.
Magsugod ang kalihukan alas-9 sa buntag ug matapos sa alas-4 sa hapon.
Nagkanayon ang pangulo sa DVMF Dr. Alice Utlang gusto nila nga mausab ang huna-huna sa publiko mahitungod sa Aspin ug wala kini kalainan sa mga pure breeds maong kinahanglan nga pareho ang pagtratar.
“Grabe kaayo ‘ta mopangga sa laing breed sa iro pero sa Asong Pinoy dili. If we train them and educate the dogs lang gyud, they can show their ability just like the others, naa ra gyud na sa paggalam,” sigon ni Dr.Utlang.
Samtang si Ryan Ong, Presidente sa K9 Cebu Agility Run Enthusiast nga usa lang sa mi-adopt og Asong Pinoy nga ginganlan niya og “Amiga” miingon nga daghan na sila og naapilan nga mga kompetisyon. (BANAT NEWS)
- Latest
