Transfer Station sa Inayawan gisita sa EMB-7

CEBU, Philippines - Dunay nakitang kalapasan ang Environmental Management Bureau (EMB)-7 sa transfer station sa siyudad sa Sugbo sa Barangay Inayawan nga iya sa EVO Ventures Inc., Group.

Kahinumduman si Konsehal Joel Garganera nagpadala og suwat sa EMB-7 nga nag-awhag sa ahensiya nga mohimo og ocular inspection sa maong transfer station tungod sa mga reklamo sa kabaho sa basura sama sa kabaho sa landfill nga puno sa nagtipun-og nga basura.

Niadtong Hunyo 19 nagpahigayon og inspection ang EMB-7 sa maong transfer station ug nakita nila ang mga kalapasan sa Environmental Compliance Certitificate(ECC) Conditions.

Ang maong transfer station gidid-an sa paghimo og ubang mga kalihukan gawas lang sa unsay nakalatid sa gisumitir sa IEE report document, giingong wala usab nakabutang sa ECC Project’s description ang pag-operate sa transfer station.Nakalapas usab sila matud pa kay ni-operate bisan og wala pa makakompleto sa mga gikinahanglang rekisitos sama sa Permit to Operate, Discharge permit ug Hazardous Waste Generator’s ID.

Pakyas usab sila matod pa sa pag-sumetir sa semi-annual compliance monitoring ug giingong wala silay gihimo aron dili makaapektar sa palibot ang mga basura gitigom.

Si   Garganera nanghinaot madawat sa Cebu City Environment and Natural Resources (CCENRO) ang maong report sa EMB-7 ug unta ang executive department mohimo lakang mahitungod niini.

Si Cebu City Mayor Tomas Osmeña sa iyang bahin miingon bisan pa man sa findings sa EMB-7 dili niini ihunong ang pagkolekta sa mga basura sa siyudad.

Gihulagway sa mayor ang tumong lang ni Garganera nga makabayad ang siyudad og mahal sa garbage collection.Hinoon kini midugang nga iyahang itugyan sa CCENRO ang pag-atiman sa gipagawas nga resulta sa inspeksiyon sa EMB-7. (BANAT NEWS)