PRO-7 gustong dinhi na lang sa Sugbo si Boniel
CEBU, Philippines - Paninguhaon sa Police Regional Office-7 nga dinhi ra gyud ikostudiya sa Sugbo o mabilanggo sa Sugbo si Bohol Board Member Niño Rey Boniel inay nga didto sa Bohol subay sa mando sa usa ka hukom didto.
Si PRO-7 Regional Director Noli Taliño mibutyag nga moduso sila og mosyon aron sa Cebu lang makostudiya si Boniel, apan ilang tahuron ang commitment order sa RTC Branch 57 sa Talibon, Bohol. Ang usa sa onse ka mga abogado ni Boniel nga si Atty. Gerry Carillo personal nga mihatud sa commitment order ngadto sa Police Station 2 diin gi-detain si Boniel aron ibalhin kini didto sa BJMP sa Bohol.
Si Boniel gipasakaan og kasong serious illegal detention ug kidnapping didto sa Bohol human gipasanginlan ni Angela Leyson, suod nga higala sa iyang asawa nga si Bien Unido Mayor Gisela Bendong-Boniel.
Si Leyson mipasangil nga gitanggong sila sa grupo ni Boniel sa Dive Camp kauban ang iyang 17 anyos nga anak ug ang na-missing pa karon nga mayor. Gawas sa maong kaso, gikasohan usab siya ug laing walo ka mga kauban og parricide diha sa Dakbayan sa Lapu-Lapu human pasanginli nga nisignit, nipusil patay sa mayor ug gitambog ang lawas sa kadagatan taliwala sa Caubian ug Isla sa Olanggo sa maong siyudad.
Matud pa niya nga mas luwas si Boniel nganhi ug usa pa nia sa Sugbo ang nag-imbestigar sa iyang mga kaso.
Apan gikwestiyon kini ni Carillo tungod kay ang kapulisan mismo ang nipasaka sa kasong kidnapping ug serious illegal detention ngadto sa Bohol. "Allegedly the victim was kidnapped, duct taped or placed in a net and brought somewhere in Caubian so basically it’s a continuing crime in Caubian and Bien Unido which could be filed elsewhere but they have chosen to file it in Tagbilaran. I don't see any logical reason why would they file a motion of reconsideration of the consequence of their action," matud pa ni Carillo.
Samtang adto na lang gipaadto ni Carillo sa Police Station 2 kagahapon si City Prosecutor Aurora Peñaflor aron i-subscribe ang kasong parricide imbes nga ibiyahe pa kini paingon sa Dakbayan sa Lapu-Lapu diin gipasaka ang maong kaso. Matud pa ni Carillo way lig-on nga ebidensiya batok kang Boniel kay negatibo kini sa paraffin test, walay armas nga nakuha ug samot nga walay patay nga lawas ni Gisela.
"We heard reports that she (Gisela) is somewhere else and refused to be found," matud pa ni Carillo. Kagabii giingong gikatakdang ibiyahe balik sa Bohol si Boniel. (BANAT NEWS)
- Latest
