Nabitik sa wire, liog nikawil

CEBU, Philippines - Patay diha-diha ang usa ka lalaki human kini nasangit sa nagbitay nga wire sa telepono didto sa Uldog St., Barangay Poblacion, dakbayan sa Talisay niadtong Huwebes sa gabii.

Si SPO1 Junard Chiong sa Talisay City Traffic Division niila sa mga biktima nga sila si Philip Carlo Lao, 20, samtang naangol ang uyab niini nga si Niña Marie Delfino, 21, pulos nagpuyo sa nahisgutang lugar.

Matud pa ni Chiong nga nagmotor si Lao uban sa iyang uyab nga padung nang mupauli sa ilang panimay.

Apan sa ilang pag-agi sa lugar wala makabantay si Lao sa nagbitay nga wire hinungdan sa pagkasangit sa iyang liog nga daw nahilos gyud kini.

Natagak sa gisakyan nga motor ang biktima ingon man ang iyang uyab apan si Lao gyud ang nagrabehan.

Gihulagway ni Chiong nga gamay na lang gyud ang kuwang hingpit gyud nga maputol ang liog ni Lao.

Nagkanayon si Chiong nga ngitngit ang maong lugar hinungdan nga wala makabantay ang biktima sa wire.

Gawas pa ang mga dagkong mga sakyanan nga naa sa lugar ang hinungdan sa pagkabitad sa wire ug wala kini nila tagda.

Nagpatabang si Chiong sa mga opisyales sa barangay aron maila kun kinsa ang nanag-iya sa wire nga maoy nakapasangit ni Lao. Sigon pa niya nga hait ang wire nga niigo ni  Lao.

Kun ila nang maila kun kinsa ang tag-iya sa wire nga niigo ni Lao hayan ila kining mapasakaan og kaso.

 Iya usab gitambagan ang mga kompaniya nga nanag-iya og dagkong sakyanan nga unta dili lang sila maghuna-huna sa ilang negosyo kundili ilakip sab nila ang kaluwasan sa ubang mga tawo.

Ang uyab sa biktima gidala sa tambalanan human nakasinati og bun-og sa iyang lawas. Wala kini makatingog sa dihang nahitabo ang disgrasya. (BANAT NEWS)