Chengdu bag-ong ‘sister’ sa Cebu City
CEBU, Philippines - Laing sisterhood agreement gisudlan sa kagamhanan sa Siyudad sa Sugbo sa usa ka lugar sa nasud sa China. Nagpinirmahay og Memorandum of Understanding (MOU) sila si Cebu City Mayor Tomas Osmeña ug Chengdu, China Mayor Luo Quiang niadtong adlaw’ng Miyerkules. Matud ni Mayor Osmeña, wala pa sila’y nahisgutan nga mga proyekto tali sa Chengdu. Iyang giangkon nga gamay ra ang iyang kasayuran bahin sa Chengdu lakip na ang kapasidad nila sa pag-assist sa dakbayan.
Sa gipirmahang MOU, nakalatid niini nga mas palambuon sa matag habig ang mutual understanding ug panaghigalaay sa duha ka nasud. Nagkauyon usab sila nga mo-establisar og friendly cooperative relation base na sa prinsipyo sa equality ug mutual benefit ug mokooperar ang duha alang sa pagpalambo sa edukasyon. Nunot niini, ang Cebu City ug Chengdu kinahanglan mo-establisar og information sharing mechanism sa mga kalihukan nga may kalabutan sa kultura, turismo ug agrikultura ug uban pa. Kahinumduman nga niadtong buwan sa Mayo, si Osmeña niadto sa Chengdu, China human kini giimbitar sa delegasyon sa maong lugar aron tukion ang mahitungod sa sister city agreement. (BANAT NEWS)
- Latest