Mga sakyanan susihon

CEBU, Philippines - Mohatag og tabang ang kagamhanan sa Siyudad sa Sugbo ngadto sa pamilya sa empleyado sa City Hall nga nakalas sa nahitabong disgrasya sa Brgy. Bonbon samtang paingon nga maghatod og tent sa Brgy. Sudlon 1.

Kahinumduman, usa ang patay ug unom ang angol sa mga trabahante sa Building and Maintenance Services sa City Hall dihang nahaybol ang ilang gisakyang trak. Ang maong disgrasya, miresulta sa kamatayon ni Victor Reyes, 35-anyos, taga Brgy. Punta Princesa.

Si Mayor Tomas Osmeña, naguol sa hitabo ug kini niingon nga mohatag ang kagamhanan og ayuda ngadto sa pamilya sa nakalas ug gani mohatag siya og P20 mil nga financial assistance gikan sa iyang bulsa.

Dugang sa mayor nga hatagan usab og trabaho sa siyudad ang asawa sa namatay. Abagahon usab sa kagamhanan ang bayrunon sa tambalanan  sa mga naangol.

Subay niini, ang pangulo sa Department of General Services (DGS) Ronaldo Malacora niingon nga posibleng mechanical o human error ang hinungdan sa disgrasya. Giingong ang maong elf truck, napaubos sa preventive maintenance niadtong Pebrero apan wala dayon makadagan sulod sa duha ka buwan kay ang registration records niini wala dayon maabot.

Gipasabot ni Malacora nga matud sa drayber nga sa pag-abot nila sa kurbada nga bahin, pagyatak niya sa brake, migahi kini ug wala kagunit hinungdan nga nahitabo ang disgrasya.

Gitagbo sab ni Malacora ang mga supervisor aron pahinumduman sa safety sa ilang mga trabahante lakip na ang pagmentinar sa mga sakyanan sa siyudad.

Tungod sa maong hitabo, ang kauban niadtong trak nga nadisgrasya, wala una gipadagan lakip na ang ubang unit sanglit ipaubos una kini sa inspeksiyon aron dili na masubli ang nahitabo. (BANAT NEWS)