Pag-uwan masinati hangtud sunod semana

CEBU, Philippines - Ang nasinating kainit sa panahon ug ang kalit nga pag-uwan gumikan sa thunderstorms, posibleng masinati pa hangtud sunod semana, matud sa PAGASA.

Halos duha ka semana nang nakasinati ang Kabisay-an ug ubang parte sa Mindanao og grabeng kainit sa panahon sa adlawan bisan kon gideklarar na nga ting-uwan karon bulana. Kasagarang matala sa PAGASA ang heat index gikan sa 36 degree celsius ngadto sa 40 degree celsius. Samtang sa udto o sa hapon, hangtud na sa kagabhion ug sa kadlawon, nasinati ang kasarangan ngadto sa makusog nga pag-ulan inubanan sa mga pagpanugdog ug kilat. 

Matud ni Engr. Alfredo Quiblat sa PAGASA Mactan, masinati pa hangtod sunod semana tungod sa monsoon break nga mas gipakusgan pa sa high pressure nga maoy hinungdan sa grabeng kainit. Tungod sab sa thunderstorm, posibleng magdala kini’g mga buhawi o alimpos nga kasagaran mahitabo sa kabukiran o sa kadagatan.

Gi-monitor sab karon sa PAGASA ug sa international weather stations kon mahinayon ba nga masinati ang El Niño phenomenon sa ikatulong quarter niining tuiga kay hangtod karon, 50 porsiyento pa gihapon ang kahigayonan niini. Bisan niini, dili angay makampante ang publiko kay tungod sa new normal, ang mga ginagmay mga pag-ulan posibleng magdala’g pagbaha ug pagdahili sa yuta ug kon init, grabeng kainiton ang masinati nga posibleng makadaot sa panglawas.

Nunot niini si Department of Health-7 regional director Jaime Bernadas niawhag sa katawhan nga manglimpyo gyud sa palibot ilabi na niining nasinati nga pag-ulan. Kinahanglan taguon o wagtangon ang mga sudlanan, ligid ug uban pang mapundohan og tubig nga posibleng puy-an og mga lamok nga nagdala og sakit nga dengue. Kinahanglan sab nga mag-amping sa pag-preparar sa mga pagkaon kay daku ang kahigayonan nga ma-contaminate kini panahon sa ting-ulan. Awhag usab ni Bernadas nga kanunay magmatngon ang mga ginikanan sa ilang anak ilabi na kon mabasa ug molubog sa baha kay basin mataptan kini og mga sakit-sakit. (BANAT NEWS)