“Fake rice” sa Sta. Fe gisusi

CEBU, Philippines - Gipadala sa Department of Social Welfare and Development (DSWD)-7 ang ilang grievance officer sa Lungsod sa Santa Fe sa isla sa Bantayan kagahapon aron susihon ang giingong peke nga bugas nga gireklamo sa pipila ka mga sakop sa Pantawid Pamilyang Pilipino Program (4Ps).

Gipahibawo sa tigpamaba sa DSWD-7, Leah Quintana nga mokuha og report ang ilang grievance officer sa maong lugar. Gipaabot nga mosumiter kini sa iyang taho karong adlawa. Ang pagsusi sa taga DSWD-7 dili madali-dali kay kinahanglan pa kining mokuha og dugang inpormasyon kon unsay paagi sa pag-apod-apod sa bugas. Dugang ni Quintana, base sa direktiba sa ilang mga labaw, kwarta maoy ihatag nila ngadto sa mga benipisyaryo aron sila na maoy magbuot kon unsay gusto nilang paliton nga bugas. Giingong laing susihon sa maong grievance officer kon aduna bay kalapasan nga nahimo sa direktiba.

Nasayran, P1, 200 ang madawat sa matag benipisyaryo kay sulod kini sa duha ka bulan ang maong grant. (BANAT NEWS)