“Fake Rice” ang gipanghatag
Matud ni DSWD-Pantawid Program mao si Linmar Cayson nga naandan gyud nga matag duha ka buwan makadawat sila og kuwarta nga para ipalit og bugas nga grant sa Pantawid, apan niadtong Lunes, ticket ra ang gipanghatag sa mga opisyal sa ilang lungsod nga maoy gamiton nila sa pagkuha sa bugas. Philstar.com/File
CEBU, Philippines - Naukay karon ang mga lumolupyo sa lungsod sa Santa Fe, Bantayan Islands tungod sa report sa social media nga mga peke ang bugas nga gihatag sa mga pamilya nga gitabangan sa Department of Social Welfare and Development (DSWD) ubos sa modified conditional cash transfer program.
Usa sa mga benepisyaryo sa DSWD-Pantawid Program mao si Linmar Cayson, kinsa mitug-an nga ang bugas nga gihatag kanila dugay’ng mahilis ug dali nga mauga.
Gani dunay kabahin sa nilung-ag nga bugas nga ilang gilingin ug giporma’g bola, mountol sab nga susama sa guma.
Matud ni Cayson nga naandan gyud nga matag duha ka buwan makadawat sila og kuwarta nga para ipalit og bugas nga grant sa Pantawid, apan niadtong Lunes, ticket ra ang gipanghatag sa mga opisyal sa ilang lungsod nga maoy gamiton nila sa pagkuha sa bugas.
Si Olma Bayno, tigpamaba sa National Food Authority (NFA) miingon nga wala pa sila makadawat og report bahin sa giingong fake rice ug dili pa sila makaingon nga peke gyud kini hangtod nga makahimo sila og laboratory analysis sa maong bugas. Susihon usab kon diin gikuha ang maong suplay sa bugas.
Sagad g’yud nga ang DSWD mokuha gikan sa NFA og bugas alang sa supplementary feeding kon adunay emerhensiya, hinungdan nga dili pa siya makabutyag kon gikan ba gyud kanila ang maong bugas,
Giawhag karon sa NFA ang publiko nga motaho gilayon kanila kon adunay mamatikdan nga dili maayong matang sa bugas, ug dili kay ideritso sa social media nga makamugna lang og kabalaka sa katawhan bisan wala pay kamatuoran.
Si Mayor Jose Esgana nakasabot sa pagpanik sa ubang lumolupyo sa nanggawas sa social media, apan iyang gipasalig nga susihon nila ang reklamo. Kagahapon adunay duha nga nag-edad og kwatro ug dos-anyos nga nalandig sa Rural Health Unit gumikan sa kalibanga, apan dili pa makonpirmar kon ang bugas ba ang hinungdan.
Ang mga tinugyanan sa panglawas nagkuha na og sample aron dad-on sa Food and Drug Administration. Wala pa mobutyag ang mga health officials kon unsay epekto sa pagkaon og peke nga bugas.
Usa ka Christine Ilustrisimo nibutyag nga naglain ang tiyan sa iyang mga anak human nakakaon sa bugas nga giluto sa iyang manghod ug niuntol sama sa bola ang kan-on nga giumol.
(BANAT NEWS)
- Latest
