Sunog sa Malibu tinuyo?

CEBU, Philippines - Dako ang pagtuo sa mga residente sa Sitio Lower Malibu, Subangdaku, Dakbayan sa Mandaue   nga tinuyo ang sunog nga nahitabo sa ilang lugar niadtong Hunyo 12 sayo sa buntag diin 50 ka balay ang naugdaw.

Kini ang nakaaghat sa 70 ka tawo sa pagpirma og petisyon nga naghangyo kang President Rodrigo Duterte sa pagpa-imbestigar sa kadudahan kaayo nga sunog.

“Among paimbestigahan kay sa among huna-huna, dili kini aksidente tungod kay usa ka Candida Tuston nga among silingan ang nisulti ni Franjo dela Victoria nga adunay tawo nga nagdala og bag unya gilabay sa among dapit ug kalit nga nibuto ug hinungdan sa among pagkasunog,” matud sa mga residente.

Kopya sa maong petisyon ang gipadangat kagahapon sa buhatan ni Presidential Assistant for the Visayas Michael Lloyd Dino.

Sa cover letter nga gipirmahan ni Cora Mather, sila nanghinaut nga mapaabot ni Dino ngadto sa Presidente ang ilang hangyo.

Sa certification nga gipetsahan og Hunyo 6, 2008 nga gipirmahan ni Police Senior Inspector Edilberto Castañeda sa Mandaue City Police Office Station 2, si Mather kuyog nilang Roy dela Victoria, Leonila Borja, Imelda Ochea ug Betty Delicano, pulos taga Lower Malibu, nipasangil nga niadtong Abril 8, 2008 sa hapon, usa ka Rowena, secretary ni Constancio Sy, ang nanghulga kanila.

“Maypa sunogon ang squatter para malimpyo ang among project,” matud pa sa gilitok ni Rowena nga na-blotter sa kapolisan.

Laing certification nga giluwatan niadtong Mayo 22, 2017 ni Chief Inspector Genilo Veraque sa MCPO Station 2 nagkanayon nga usa ka Joan dela Victoria, 30, taga Lower Malibu, ang nitaho nga alas 9:30 sa buntag sa maong adlaw, si Sy, Ariel Collantes ug Rowena ang nanguha og hulagway sa ilang lugar.  “Amo ni-e-blotter kay wa mi kahibawo unsay dangatan namo og dihang lugara sila ra baya sigeg Kodak wa mi kahibawo og unsa ila intention,” matud ni dela Victoria ngadto sa kapolisan.

Gipatawag sa barangay sila si Sy ug kaubanan apan giingong pakyas sa pagtambong sulod sa tulo ka higayon hinungdan nga si Barangay Kapitan Ernie Manatad niluwat og Certification to File Action niadtong Hunyo 14, 2017, duha ka adlaw human sa sunog nga giingong nagsugod sa panimaye ni Candida Tuston ug daling nakakatap sa mga silingan nga nagbilin og gibana-bana P300,000 nga danyos. (BANAT NEWS)