‘Drug-cleared certificate’ di na bawion
CEBU, Philippines - Dili na bawian og certificate isip “drug-cleared” ang siyam ka barangay nga nasuta nga aduna pay drug surrenderers nga napositibo sa ilegal nga drugas.
Ang maong mga barangay apil sa 120 ka barangay sa tibuok lalawigan nga gideklarar nga “drug-cleared” sa oversight committee niadtong Abril.
Apan gihatagan kini og notice sa committee human nga napositibo ang mga drug surrenderers sa ilegal nga drugas atol sa kinalit nga drug test nga gipahigayon sa Cebu Provincial Anti-Drug Abuse Office (CPADAO).
Matud ni Ivy Durano-Meca, pangulo sa CPADAO, nga human napadad-an og notice sa oversight committee ang maong mga barangays, gitabangan usab kini nila pinaagi sa relapse intervention program nga gihimo sa mga drug surrenderers. Ang siyam ka barangay gihatagan og 30 ka adlaw sa pagsulbad sa maong problema ug sulod sa maong programa, gipaubos usab sa relapse intervention program ang mga drug surrenderers.
Ang maong programa nagtutok sa paghatag og psycho-education ug counseling sa mga drug surrenderers sa maong barangay.
Gumikan niini, magpabilin ang certificate sa maong mga barangay isip “drug-cleared” sa Lalawigan sa Sugbo sanglit nahatagan na man kini og kasulbaran karon sa maong mga barangay sumala sa CPADAO. (BANAT NEWS)
- Latest