Kapitan apil sa drug list
CEBU, Philippines - Gibutyag sa Cebu Provincial Anti-Drug Abuse Office (CPADAO) nga anaa sa listahan sa mga nalambigit sa ilegal nga drugas ang barangay kapitan sa Lamintak Norte, Medellin.
Si Kapitan Rene Carolasan Olivar nadakpan sa kapolisan pinaagi sa search warrant sa niaging semana.
Si Olivar mao sab ang pangulo sa Association of Barangay Councils sa lungsod.
“He is really known gyud to siya, naa gyud to siya sa lista kato siya nga kapitan,” matud ni Ivy Durano-Meca, ang pangulo sa CPADAO.
Matud ni Meca nga ang barangay usa sa “moderately affected” nga barangay sa ilegal nga drugas sa lungsod nga adunay 49 ka drug surrenderers diin 13 niini ang pushers ug 36 ang users.
Wala sab kini naapil sa gi-endorso nga himoong “drug cleared” barangay sa lungsod.
Sumala pa ni Meca nga ang Barangay Caputatan Norte, Maharuhay ug Dalingding Sur lang ang gi-endorso isip drug cleared sa 19 ka barangay sa Medellin diin 13 niini ang moderately affected ug unom ang “slightly affected”.
Si Meca nipasabot nga ang usa ka “slightly affected” nga barangay mao ang adunay presensiya sa users ug ang “moderately affected” mao ang adunay presensiya sa pushers ug users samtang ang “seriously affected” mao ang adunay marijuana cultivation, mini-laboratories sa ilegal nga drugas ug drug den o suyopanan.
Ang tibuok lungsod sa Medellin adunay 1, 815 ka drug surrenderers. (BANAT NEWS)
- Latest
