Banat ( Leaderboard Top ), pagematch: 1, sectionmatch: 1

Priso nag-wild, lima gidunggab

CEBU, Philippines - Lima ka mga priso ang nakaangkon og samad dinunggaban sa ilang lawas human nga naghuramentado ang usa ka piniriso sa Cebu Provincial Detention and Rehabilitation Center (CPDRC) Sabado sa gabii.

Ang 55-anyos nga pinirisong wala hinganli giingong misaka sa second floor ug misud sa selda sa laing piniriso ug didto kalit kining nanunggab.

Ang duha ka mga kauban sa biktima misuway og luwas kaniya apan giapil sila og dunggab. Nitabang usab ang laing duha gikan sa pikas nga selda apan nadunggaban usab sila sa mga kamot ug lawas.

Wala masayod ang unang biktima unsay gikasuk-an kaniya sa suspek kay dugay na man silang kaila sa sulod.

Ang nanunggab adunay kasong murder ug illegal possession of firearms. Samtang ang unang gidunggab may kasong murder ug gikonsiderar nga high profile inmate sa CPDRC, apan wala gyud mobutyag ang mga opisyal kun kinsa kini.

 “We are still investigating. We haven’t started the full investigation. Not to protect them but the investigation (bahin sa pagpangayo og impormasyon sa nahitabo) will go on smoothly,” matod ni Roberto “Bobby” Legaspi, ang acting jailwarden sa maong pasilidad.

Matud ni Legaspi nigamit og improvised nga kutsilyo gikan  sa gunting ug usa ka 4-pulgadas nga lansang ang suspetsado.

Padayon karon ang gihimong imbestigasyon sa Provincial Public Safety Company (PPSC). Ang suspek nagpabilin nga hilom sa sud sa isolation cell.

Samtang ang mga biktima nagpatambal sa infirmary sulod sa maong provincial jail.  Gitataw hinoon ni Legaspi nga walay kalambigitan sa illegal nga drugas ang maong panghitabo.

Si Legaspi nagkanayon nga ang CPDRC, adunay dul-an 10 ka mga high profile inmate sa sulod nga giipon ra sa mga regular nga priso kay kulang ang mga selda. (BANAT NEWS)

  • Follow Us: