Nipalit og shabu gipatay

CEBU, Philippines - Patay ang usa ka lalaki human gipusil samtang matud pa nipalit og ginadiling drugas diha sa Sitio Magay, Barangay Tanke, Dakbayan sa Talisay niadtong Domingo sa kaadlawon.

Ang biktima nailhan nga si Jhon Beboy Abaquita, 26, taga Sitio San Pio Village, Barangay Dumlog sa nahisgutang siyudad.   Samtang ang suspek nailhan sab nga si Titing Mangaron taga Sitio Rattan sa maong barangay.

Si SPO2 Yvonne Ilustrisimo sa Talisay City Police Station nagkanayon nga gikan nipalit og ginadiling druga ang biktima ug samtang naglakaw gisundan kini sa suspek ug gipusil sa makadaghang higayon.

Nisibat ang suspek apan adunay mga tawo nga nakakita sa iyang gibuhat ug maoy nisumbong sa mga polis apan wala na nila kini maapsi pa.

Nakuha sa crime scene ang upat ka basiyo sa bala nga .45 kalibre ug tulo ka gagmay nga paketeng shabu diha sa crime scene.

Gidala sa Talisay City District Hospital ang biktima apan gideklarar kini nga dead on arrival.

Matud pa ni Ilustrisimo nga bangi sa ginadiling drugas ang  ilang gitan-aw nga motibo sa krimen.

Samtang  gidakop sa usa ka polis ang iyang igsuon nga adunay kaso nga giatubang may labot sa ginadiling drugas.

Si SPO3 Nestor Canlobo sakop sa Provincial Public Safety Company (PPSC) sa Cebu Provincial Police Office (CPPO) maoy nangulo sa pag-serve sa warrant of arrest sa iyang igsuon nga si Christopher Canlobo alyas Etcho nga taga Sitio Hawod, Barangay Bulacao, Dakbayan sa Talisay.

Ang warrant of arrest giluwatan ni Judge Glenda Go sa Regional Trial Court (RTC) branch 65 tungod sa kaso sa illegal drugs ug wala kini gitugot nga piyansa.

Si SPO3 Canlobo ang giubanan sa mga sakop sa Talisay City Police pinanguluhan ni SPO4 Rolando Andales.

Si SPO3 Canlobo ang kanhi nadestino sa maong dakbayan apan nabalhin human naduhig ang pangalan sa iyang igsuon nga giilang big time drug pusher sa ilang lugar. (BANAT NEWS)