Pagtapak sa libaong buot idungan sa dry run

CEBU, Philippines - Gipaabot nga sunod semana sugdan na sa Department of Public Works and Highways (DPWH) ang pagtapak sa libaong sa mga diversion road nunot sa himoon nga dry run subay na sa pag-ugmad sa under pass project sa may eskina N. Bacalso Avenue ug F. Llamas Street habig sa Brgy. Basak San Nicolas sa Siyudad sa Sugbo.

Matud ni Project Engineer Roy dela Cruz nga nakig-alayon pa sila sa kontraktor sa underpass project diin ang ilang target nga sa dili pa ang adlaw’ng Huwebes sunod semana masugdan na ang pagtapak sa mga libaong.

Dugang niini nga mohangyo sila sa Cebu City Transportation Office (CCTO) nga samtang naghimo sa maintenance work sa kadalanan, idungan usab sa pagtrabaho ang underpass.

Iyang gidugang nga posibleng molanat og duha ka semana ang pagtapak sa mga libaong apan dili na nila kini huwaton nga mahuman ang duha ka semana ug kon mahimo makasugod usab sila sa ikaduhang dry run.

Nasayran nga nadugay og trabaho ang patching sa mga diversion road sama sa Ganciang ug Tagunol sanglit wala man kini maapil sa kontrata.

Karong adlawa mahibaw-an kon pila’y magasto sa DPWH sa patching sa mga libaong nga giplanohang himoon sa rush hours. Nunot niini, masaligon si Engr. dela Cruz nga mouyon ang CCTO sa ilang hangyo.

Kahinumduman nga una nang nipadayag ang pamunuan sa CCTO nga una himoon ang laing dry run sa dagan sa trapiko sa nahisgutang lugar, kinahanglan una nga matapakan ang mga libaong sa mga diversion road aron dili makabalda ug makamugna og kahuot sa dagan sa trapiko. (BANAT NEWS)