Tabunok flyover maagian na karon
CEBU, Philippines - Maagian na sugod karong alas tres sa hapon ang Tabunok flyover matud pa sa taga Department of Public Works and Highways dinhi sa rehiyon.
Si Engr. Leslie Molina ang district engineer sa DPWH-7 niingon nga maagian na ang flyover sa Tabunok human nila paabota nga mahuman ang curing period nga gidapat sa maong flyover.
Una niini, si Konsehal Socrates Fernandez sa lokal nga kagamhanan sa Dakbayan sa Talisay, nipadala og suwat kang Molina kabahin sa ilang pagtrabaho sa flyover kon kanus-a mahuman.
Giasoy ni Molina nga ila lang gipaabot nga mauga ang semento nga ilang gibutang niini nga maoy ilang nasabotan sa kontraktor.
Dugang sa enhenyiro nga sigurado siya nga lig-on na ang flyover tungod sa mga ekipo ug materyales nga ilang gigamit.
Iyang gipasabot nga 15 ka adlaw ang iyang gipangayo nga pagtrabaho niini kay ila mang giapil sa pagkwenta ang mga adlaw nga uwanon. Apan kay maayo ra man ang panahon, ila kining nahuman og sayo.
Sukad gisirad-an og usab ang Tabunok flyover niadtong niaging Biyernes sa gabii, daghan ang nagyawyaw tungod sa kahinay sa dagan sa mga sakyanan sa lugar.
Gani ilang gisaway ang mga sakop sa City of Talisay-Traffic Operation Development Authority (CT-TODA) nga daw wala’y nahimo pagtabang sa dagan sa trapiko. (BANAT NEWS)
- Latest