Mata sa tiguwang gilugit

CEBU, Philippines - Tiguwang nga masahistang babaye gilugitan sa iyang mata sa masuk-anong kanhi kawani sa Cebu City Hall tungod kay gibalibaran sa iyang tinguha nga magpamasahe unta didto sa Barangay Sawang Calero kagahapon sa buntag.

Si Faustina Gilay, 79, mibalibad nga dili siya momasahe ni Manuel Sumalpong tungod kay galain ang iyang lawas, apan nasuko kaniya si Sumalpong nga kanhi kawani sa Cebu City Hall.

Dunay nakakita nga giyak-an ni Sumalpong ang tiguwang nga nagpaninggit og pakitabang, apan wala gyuy nakaasoy kon giunsa paglugit ang kalimutaw sa tiguwang. Ang usa sa duha ka kalimutaw nakit-an human sa hitabo nga gihulmigas na sa    sawog.

Ang apo sa biktima nga si Walter Jayson nagtuo nga gituok ang iyang apohan kay nakaangkon usab kini og samad sa iyang liog. Gituohan usab nga gigamitan og kutsilyo sa suspek ang paglugit sa kalimutaw sa tiguwang.

Ang karaang ID ni Sumalpong sa City Hall nahibilin sa balay sa biktima ug nakapadali sa pag-ila kon kinsa ang nagamong-among sa tiguwang. Human sa hitabo, gitabangan pagdakop sa mga tawo si Sumalpong.

Pagsusi sa mga silingan sa biktima didto sulod sa iyang balay  na nakit-i ang kalimutaw nga gihulmigas na. Matud ni Sawang Calero Barangay Captain Ariel Yburan nga buotan man nga pagkatawo si Sumalpong, apan nakadungog sila nga mogamit kini og marijuana.

Trabahante si Sumalpong sa City Hall apan natangtang sa trabaho diha nga bag-o na ang administrasyon. Nadunggan usab ni Kapitan Yburan nga ang asawa ni Sumalpong gusto nga makigbuwag sa iyang bana.

Human madakpi si Sumalpong didto na   duol sa Taboan Market, gitabangan siya’g kulata sa mga tawo, sa wala pa itugyan sa kapolisan. Gituohan nga mabuta na gyud ang tiguwang. (BANAT NEWS)