Rerouting sa N. Bacalso-F. Llamas

CEBU, Philippines - Ipahigayon karong adlawa sa Department of Public Works and Highways (DPWH) ang dry run sa rerouting nunot sa ugmaron nga underpass sa eskina N. Bacalso Avenue ug F. Llamas St., Siyudad sa Sugbo.

Subay niini, ang Cebu City Transportation Office (CCTO) nangandam diin sigun sa ilang operation head, Francisco Ouano, ang dry run magsugod alas 6 sa buntag ug moabot sa dul-an 50 ka traffic enforcers ang ilang ipakatap.

Giawhag sab ang publiko ilabi na ang gikan ug paingon sa habagatang bahin nga mosayo sa ilang trabaho ug klase aron dili matanggong sa trapik.

Ang mga traffic enforcers bahinon sa duha diin dunay mo-duty gikan sa alas 6 sa buntag hangtud sa alas 2 sa hapon ug alas 2 sa hapon paingon na sa alas 10 sa gabii.

Dugang ni Ouano nga kung hingpit na gyud masugdan ang maong proyekto, kadtong mga jeep nga moagi sa dapit adto paagion sa Gansiang ug Mari Gochan Street ug kadtong mga bus, mini-bus, private vehicles ug trucks mahimong moagi sa South Road Properties (SRP).

Gitataw sa CCTO nga andam na gyud sila niini kay ila na man kining gipangandam ug karong adlawa makita nila kung unsay dagan sa trapiko.

Samtang si Konsehal Dave Tumulak mo-obserbar usab sa dry-run karong adlawa ug kini niingon nga  gipangandaman gyud sa siyudad ang kahuot sa dagan sa trapiko.

Nihangyo ang konsehal sa mga motorista nga mosabot sa dry-run ug gipasalig nga ang siyudad mangita og solusyon aron matubag ang mga problema nga motumaw. (BANAT NEWS)