Gullas wa kauyon sa pagdili sa mga bata sa motor
CEBU, Philippines - Dili kaayo uyon si Talisay City Mayor Eduardo Gullas sa balaud nga gipasar nga dili na pwedeng maka-angkas sa motorsiklo ang mga bata.
Kini human iyang nakita nga doble ang gasto sa mga ginikanan nga mohatud ug mokuha sa ilang kabataan sa tunghaan.
Matud ni Gullas nga bisan asang lugar dako kaayo og tabang ang motorsiklo pinaagi sa transportasyon.
“Nahibawo ko nga ilang gitimbang pero nidaug gyud ang safety over the necessity,” nagkanayon si Gullas.
Isip usa ka abogado, si Gullas naglibog kon unsaon niya pag-estorya ang kapolisan ug mga barangay opisyal sa pagpatuman sa maong balaud tungod kay luoy ang katawhan nga nikuha og motor para sa ilang kabataan aron makadaginot sa plitehan apan dakpon na hinoon.
Sumala pa niya nga ang importante lang mao nga ang drayber sa motorsiklo adunay lisensya ug magsul-ob gyud og helmet ingon man ang bata nga moangkas niini.
Hinuon iyang mando mao nga ila gyud sitahon ang mga tawo nga magmotorsiklo aron mahibawo ang kadaghanan nga istrikto sila sa helmet ug drayber nga wala’y lisensya. Pipila ka local government units ang hugot na nga nipatuman sa Republic Act 1066 kun ang Children’s Safety on Motorcycles Act of 2015. (BANAT NEWS)
- Latest
