Hulagway sa mga sakop sa Maute-ISIS gipakatap

CEBU, Philippines - Gipakatap na sa mga sakop sa Cebu City Police Office ang mga hulagway sa mga miyembro sa gitawag karon sa militar nga Maute-ISIS alang sa kasayuran ug seguridad sa publiko isip pangandam kung maabot sila dinhi sa Central Visayas.

“We distribute the photos of the members of the Maute group considering na we want to be aware yung mga community natin dito sa Cebu City wherein kung meron silang makita na mga members sa mga Maute group ay agad nang impormahan ang nearest police station or dito sa headquarters for us to conduct a validation and right away police intervention if necessary,” matud pa sa hepe sa City Intelligence Branch nga si Chief Insp. Cristopher Navida.

Lakip sa mga hulagway mao ang Maute brothers nga silang Abdullah ug Omarkhayam Maute ug ang ilang inahan nga si Farhana Maute kinsa aduna nay warrant of arrest sa kasong rebelyon tungod sa taho nga sila ang namuno sa kagubot didto sa Marawi City kauban ang teroristang grupong ISIS.

Butyag ni Navida nga una na nilang gipangtagaan ang mga security management sa mga hotels, malls ug mga pension houses sa siyudad sa Sugbo. Sunod nga gipanghatagan ang mga police stations ug gi-post na usab kini sa mga social media sites.

Matud pa ni Navida nga kung makit-an kining mga tawhana isumbong dayon kini sa pinakaduol nga police station o idiretso na sa Cebu City Police Office (CCPO). Giklaro ni Navida nga pagpangandam lang  kini ug dili tinuod nga naabot na dinhi sa Sugbo ang maong grupo. Samtang human sa nahitabong kagubot didto sa Resorts World Manila diin 38 ka mga kinabuhi ang nakalas  sa pag-atake sa usa ka armadong tawo, si Navida miingon nga magbutang na sila og mga polis sa mga hotels aron nga masiguro ang seguridad niini. - /EIM) (BANAT NEWS)