Pagbatok sa dengue gihingusgan

CEBU, Philippines - Sugdan na sa pagpanghatag sa Department of Health (DOH) ang mga anti-dengue vaccine sa mga bata karong umaabot Hunyo 16.  Gipahibalo ni Dr. Jaime Bernadas, director sa DOH-7 nga ang kabataan nga nag-edad og 9-anyos maoy mabakunahan sanglit sila ang daling mataptan          og dengue base sa statistics.

Nunot niini, giawhag ni Bernadas ang mga ginikanan nga moadto sa ilang clinic aron pabakunahan ang ilang mga anak. Kinahanglan, tulo ka shots sa bakuna ang maangkon sa bata diin ihatag kini matag 6 ka bulan.

Buot sa kagamhanan sa Dakbayan sa Talisay nga maibanan ang kaso sa dengue sa ilang lugar hinungdan nga ilang gilusad ang Anti-Dengue Barangay Brigade.

Si Mary Grace Cañas, dengue coordinator sa City Health Office mipasabot nga ilang gisayo ang kasaulogan sa Asian Dengue Day aron malusad ang maong programa.

Nahimo ang Anti-Dengue Barangay Brigade human ilang nakita nga dili madala sa Dengue Task Force ang pakigkumbati sa makamatay nga sakit mao nga pinaagi sa barangay, matabangan sila sa kampanya batok dengue.

 Nasayran nga moabot sa 150 kapin ang kaso sa dengue sa Talisay sa miaging mga buwan ug gani duha ka bata na ang namatay. (BANAT NEWS)