Kanhi sakop ni Jaguar nadakpan
CEBU, Philippines - Gituohang kanhi sakop sa grupo ni Jeffrey “Jaguar” Diaz, ang inilang drug lord nga napatay didto sa Las Piñas nadakpan sa Sitio Chicago, Barangay Duljo-Fatima ning dakbayan sa Sugbo.
Ang nadakpan mao si Arnulfo Abellana, 52, kinsa napriso na kaniadto tungod sa kasong pagpatay.
Matud pa sa hepe sa Mambaling Police Station Police Senior Inspector Eduard Sanchez dul-an sa duha ka semana nilang gi-monitor si Abellana nga giingong sinaligan usab sa laing gipasanginlang druglord nga naila sa ngalang Tatay Renio.
Nakuhaan kini og mga pinutos nga shabu nga mobalor og dul-an sa P185mil. Apan si Abellana hugot nga nihimakak sa mga pasangil nganha kaniya.
Samtang nasakmit sa kapolisan sa Lapu-Lapu ang usa ka .45 kalibre pistol ug P500 mil nga kantidad sa drugas sa managlahing buy-bust operation ug checkpoints sa siyudad nga niresulta sa pagkasikop walo ka tawo.
Sa Barangay Langtad sa Dakbayan sa Naga nadakpan sila si Jovani Degracia, 28, nga target sa buy-bust operation ug unom ka mga lalaking giingong nanuyop.
Gironda usab sa mga otoridad ang Operation Second Chance nga gipasiugdahan ni Konsehal Dave Tumulak, Deputy Mayor for Police Matters ug niresulta sa pagkasakmit sa daghang kontrabando.
Nakakuha sila og mga kontrabando sama sa improvised weapons, marijuana, gamay’ng pakete sa gituohang shabu ug uban pa. Rowena Capistrano, Romeo Limpangog , Decemay P. Padilla ug reports nilan Shane Maniego ug Jemmuel Man-on (BANAT NEWS)
- Latest
