Malacañang nipasusi sa luna sa Mandaue City Jail

CEBU, Philippines - Nimando ang Malacañang sa Bureau of Jail Management and Penology sa pagsusi sa kahimtang sa luna sa Mandaue City Jail nunot sa giingong walay legal nga dokumento sa pagpagamit sa kagamhanan sa siyudad.

Si Presidential Complaint Center Director Jaime Llaguno Mabilin niduso niadtong Mayo 15, 2017 kang BJMP Director Serafin Petronio Barreto Jr. sa kopya sa email nga gipetsahan og April 20, 2017 gikan ni Dr. Danilo Dionson kinsa nagpatabang sa presidente labot sa maong isyu.

Ang city jail gitukod niadtong 1990s pa panahon ni kanhi mayor Alfredo Ouano sa may J.M. Ceniza St., Barangay Looc sa luna nga bahin sa kagamhanan sa siyudad gikan sa reclamation project sa ECO Development Corporation nga gipanag-iya ni Ernesto Ouano Sr. Si Dionson nakakuha og kopya sa Deed of Usufruct nga pirmado ni kanhi mayor Thadeo Ouano ug kanhi city jail warden, Chief Inspector Jose Moring, apan walay petsa ug dili notaryado.

Plano karon sa siyudad nga ipagamit sa BJMP ang luna nga kasamtangang giokupar sa Land Transportation Office nga gikatakdang ibalhin apan kusganon sab nga gisupak ni Dionson ug kaubanan. (BANAT NEWS)